Полицискиот час од среда да почнува од 23, а кафулињата да работат до 22.30 часот, е предложено на денешниот состанок на Централниот кризен штаб, а одлуката треба да биде усвоена на утрешната владина седница. И понатаму дозволено ќе биде да работат само летните тераси на угостителските објекти, пишува СДК.МК

Ваквиот предлог доаѓа откако изминативе денови паѓаат бројките на новозаразени лица со коронавирус. Вчера беа регистрирани 105 нови позитивни на ковид-19 од 946 тестови, а активни се 14. 276 случаи, стои во статијата на СДК.МК

Кафулињата и кафеаните се отворени од 28 април. Сега работат до 20.30 часот, бидејќи според минатонеделната одлука на Владата полицискиот час почнува од 21 часот. Полицискиот час не важеше во саботата кога верниците во црквите и манастирите го прославуваа Велигден. Полициски час нема да има ни за Рамазан бајрам, односно вечерта на 12 мај.

Од утре почнува и масовната вакцинација против ковид-19 со кинеската вакцина во Скопје и во Куманово, Штип, Кавадарци, Тетово, Охрид и Битола, а според распоредот на веќе пријавени граѓани ќе биде и распределена и бројката на вакцини. Министерот за здравство Венко Филипче најави и дека до крајот на мај ќе има пунктови за масовно вакцинирање и во Велес и во Прилеп. Досега, вкупно се вакцинирани 61,603, а пријавени се 218,577 граѓани

ИЗВОР СДК.МК

ПОВЕЌЕ СОДРЖИНИ: ЗНМ: Важноста на независното и професионалното новинарство стана поважна од кога било

Одбележувајќи го Светскиот ден за слобода на медиумите – 3 мај, денес во услови на светска здравствена криза, повеќе од кога и да е претходно стана јасно значењето на независното и професионално новинарство. Кризата предизвикана од пандемијата со Ковид-19 ги исфрли на врвот сите доблести, но и слабости на новинарството кое во изминатиот период минува низ сериозни промени и премрежја.

Професионалното наспроти пропагандистичкото новинарство, денес е повеќе од било кога предизвик за сите нас, да се обидеме да го одржиме квалитетот на новинарите кои ја негуваат слободната мисла како водич, низ пречките со кои се соочува светот, но и Северна Македонија.

Одговорното и професионално новинарство токму во оваа кризна ситуација се покажа како клучно во насока на информирање на граѓаните. Затоа, Здружението на новинари на Македонија заедно со Мисијата на ОБСЕ во Скопје, повикуваат на солидарност и поддршка, пред сè од јавноста, за новинарите и медиумските работници кои во изминатата година се соочуваат со големи здравствени, безбедносни, финансиски, но и етички предизвици, во обидот соодветно и навремено да ја информираат јавноста за случувањата поврзани со Ковид-19 пандемијата. Борбата против дезинформациите кои се покажаа како особено штетни во вакви предизвикувачки времиња е можна само со производство на објективни и точни информации и транспарентна работа на Владата и на другите јавни институции. Но, не е само пандемијата дел од сликата за новинарството и медиумите денес. Бавниот напредок на медиумските слободи на светските листи што ги мерат овие параметри покажува дека се потребни дополнителни напори на целата заедница во Северна Македонија, за посилен пробив кон листата на земји во кои медиумите се целосно слободни. Новинарството мора да се третира како јавно добро, а протокот на информациите не смее да биде ограничен.